නරියා කට ඇරියාම නරියම තමයි.. – තිසරගේ බිරිඳ මාලිංගගේ බිරිඳගේ කතාවට සැර උත්තරයක් දෙයි

වේග පන්දු යවන ක්‍රීඩක ලසිත් මාලිංගගේ බිරිඳ ටාන්‍යා පෙරේරා සිය ෆේස්බුක් ගිණුමේ තැබූ සටහනක් පිළිබද අප ඔබට ඊයේ (03) වාර්තා කළා.

එහිදි ඇය සටහන් කර තිබුනේ “ක්‍රීඩා ඇමති පත්වීම අරගෙන ගෙදරට ගොඩවෙන කොට, චීත්තයක් ඇඳ ගනිපු හෙන පොරක් කියල හිතන් ඉන්න ක්‍රීඩකයෙක් තමන්ගේ තැන රැක ගන්න ගෙදරට ඇවිත්” යනුවෙනි.

එම සටහන අඩංගු ඡායාරූපය ටාන්යා විසින් එක් කර තිබුනේ “Poor Pandas” යන උද්දෘතය සමගිනි. පැන්ඩා යන අන්වර්ථ නාමයෙන් කණ්ඩායමේ හඳුන්වන්නේ තිසර පෙරේරා වීම විශේෂත්වයකි. කෙසේ වෙතත් පසුව ටාන්‍යා විසින් ඡායාරූපයේ පූර්වීකාව සංස්කරණය කරමින් “පැන්ඩා” යන කොටස ඉන් ඉවත් කිරීමට කටයුතු කර තිබුනි. තිසර පෙරේරා සහ වත්මන් ක්‍රීඩා අමාත්‍ය හරීන් ප්‍රනාන්දු දෙදෙනාම කොළඹ ශාන්ත ජෝශප් විදුහලේ ආදි ශිෂ්‍යයන් ය.

කෙසේ වෙතත් ලසිත් මාලිංගගේ බිරිදගේ ෆේස්බුක් සටහනට තිසර පෙරේරාගේ බිරිද වන ශෙරමි දිනුෂිකා පෙරේරා ෆේස්බුක් සටහනක් මගින් ප්‍රතිචාර දක්වා තිබෙනවා.

ඒහි දැක්වෙන්නේ “නරියෙක් සිංහ හමක් පොරවගත්තට කවදාවත් සිංහයෙක් වෙන්නේ නැහැ, නරියා කට ඇරියාම නරියම තමයි”, යනුවෙනුයි

කෙසේ වෙතත් මෙවැනි තත්වයක් මත ජාතික කණ්ඩායමේ ක්‍රීඩකයන් කණ්ඩායමේ ස්ථාන ඉල්ලා දේශපාලකයන් පසුපස යාමද, ජාතික කණ්ඩායමේ ක්‍රීඩකයන් පවා එකිනෙකා සමග ප්‍රසිද්ධියේ ඇනකොටා ගැනීමෙන්ද තවදුරටත් විනාශ වන්නේ ශ්‍රී ලංකා ක්‍රිකට් ක්‍රීඩාවයි.