අන්තවාදීන් මුහුදෙන් පළායාම වැළැක්වීමට ඉන්දියාවෙන් මෙහෙයුමක්

මෙරට බෝම්බ ප්‍රහාර එල්ල කරනු ලැබූ ඉස්ලාමිය අන්තවාදී සංවිධානයක සාමාජිකයින් ඉන්දියාවට ඇතුල් වීමට වැළැක්වීම සඳහා ඉන්දීය වෙරළාරක්ෂක බළකාය ඉන්දු-ශ්‍රී ලංකා මුහුදු සිමාවේ සිය නිරීක්ෂණ මෙහෙයුම් වැඩි කර ඇති බව ඉන්දීය මාධ්‍ය වාර්තා කර සිටිනවා. 

මේ අතර ශ්‍රී ලංකා නාවික හමුදාවද මෙරට මුහුදු සිමාවේ මෙහෙයුම් වැඩි කර තිබෙනවා. නාවික හමුදාවේ මාධ්‍ය ප්‍රකාශක ලුතිනන් කමාන්ඩර් ඉසුරු සුරියබණ්ඩාර ප්‍රකාශ කර සිටියේ නාවික හමුදාවේ මුර යාත්‍රා විසින් පැය 24 පුරාම සිය නිරීක්ෂණ කටයුතු සිදුකරන බවත් මුහුදේ තිබෙන සැකකටයුතු යාත්‍රා පරික්ෂා කිරීම ආදිය දිගින් දිගටම සිදුකරන බවයි.

ඊයේ (21) දිනයේදී කොළඹ සහ මඩකලපුවේ ස්ථාන 08 ක සිදුවූ බෝම්බ පිපිරවීම් සම්බන්ධයෙන් තව්ෆිත් ජමාත් නම් ඉස්ලාමිය අන්තවාදී සංවිධානයක් සිටින බවයි කැබිනට් මාධ්‍ය ප්‍රකාශක අමාත්‍ය රාජිත සේනාරත්න අද (22) කොළඹ දී පැවති මාධ්‍ය හමුවකට එක්වෙමින් කියා සිටියේ.