නිකාබය ඉවත් කිරීමට අවසර

මුස්ලිම් කාන්තාවන් මුහුණ වැසෙන පරිදි දමාගෙන යන නිකාබ් (සම්පූර්ණ මුහුණ ආවරණය කරන කොටස) නිවසින් එළියට යද්දි ඉවත් කර යන්නට අවසර දුන් බව සමස්ත ලංකා ජමෙයියතුල් උලමා සංවිධානයේ මාධ්‍ය ලේකම් අශ්ෂේක් ෆසිල් ෆාරුක් මහතා ප‍්‍රකාශ කළේය.

එමෙන්ම මුස්ලිම් කාන්තාවන් අදින කළු පැහැති ඇදුම වෙනුවට වෙනත් වර්ණ වලින් මැසූ ඇදුම් අදින්නැයි ඉල්ලා සිටි බව ද ෆාරුක් මහතා කීය.

රටේ පවතින තත්ත්වය යටතේ ආරක්ෂක හමුදාවන්ට සහය දිය යුතු බැවින් මෙසේ අවසර දුන් බව ද හෙතෙම කියා සිටියේය.
මුස්ලිම් ජනතාව නිරන්තරව රටේ එක්සත් භාවයට නතුවන බවත් ආරක්ෂාව වෙනුවෙන් කටයුතු කරන බවත් කී ෆාරුක් මහතා කෙසේ වෙතත් ඉකුත් ඉරිදා එල්ල වූ ප‍්‍රහාර කිසිවක් මේ කියන කාන්තා ඇදුම ඇද ගොස් කළ ඒවා නොවන බවත් ඔවුන් ගොස් ඇත්තේ කලිසම් ෂර්ට් ඇද ගෙන බවත් හෙතෙම කියා සිටියේය.

අශ්ෂේක් ෆසිල් ෆාරුක් මහතා මේ අදහස් පළ කළේ සමස්ත ලංකා බෞද්ධ මහා සම්මේලනයේ පැවැති අන්තර් ආගමික සංසදයේ මාධ්‍ය හමුව අමතමිනි.