බදියුදීන්ට එරෙහි විල්පත්තු නඩුව මුල සිට යළි විභාග කිරිමට අභියාචනාධිකරණය තීන්දු කරයි

අමාත්‍ය රිෂාඩ් බදියුදීන් මහතා ඇතුළු වග උත්තරකරුවන් පිරිසකට එරෙහිව පවරා ඇති නඩුව ජුලි මස 31 වන දා සිට මුලසිට නැවත විභාග කිරීමට අභියාචනාධිකරණය අද තීරණය කර තිබෙනවා.

පරිසර යුක්ති කේන්ද්‍රය විසින් මෙම නඩුව ගොනු කර ඇත්තේ, විල්පත්තුව අභය භූමිය ආශ්‍රිත ප්‍රදේශවල ,පිහිටි ඉඩම් අක්කර 100 ගණනක් මුස්ලිම් ජනතාවගේ පදිංචිය සඳහා නීතිවිරෝධි අන්දමින් ලබා දීමට දරන උත්සහය වළක්වන නියෝගයක් නිකුත් කරන්නැයි ඉල්ලමින්.

අද දින මෙම නඩුව කැඳවනු ලැබුවේ ජනක් ද සිල්වා සහ නිශ්සංක බන්දුල කරුණාරත්න යන විනිසුරුවන් හමුවේයි.

අමාත්‍ය රිෂාඩ් බදියුදීන් , වන ජිවි දෙපාර්තමේන්තුවේ සහ වන සංරක්ෂන දෙපාර්තමේන්තුවේ අධ්‍යක්ෂ ජනරාල්වරුන් ඇතුළු පිරිසක් වගඋත්තරකරුවන් ලෙස නම් කර කරමින් මෙම නඩුව ගොනු කර තිබෙනවා.

2015 වසරේදී ගොනු කළ මෙම නඩුවේ තීන්දුව ඊයේ ප්‍රකාශයට පත් කිරිමට නියමිතව තිබුණා.

එම නඩුවේ විභාගය පසුගිය වසරේ සැප්තැම්බර් මස අවසන්වී තිබු අතර තීන්දුව නිකුත් කිරීම මින් පෙර අවස්ථා 04කදීම කල් දැමීමට එම නඩුව විභාග කළ අභියාචනාධිකරණ විනිසුරු මහින්ද සමයවර්ධන මහතා නියෝග කර තිබුණා.