ලංකාව කසල ගබඩාවක් කරන ගැසට් පත්‍රය ඉවත් කරන්නේ නෑ – ඇමති නලින්

විදේශ රටවලින් කසල ගෙන්වීමට අවස්ථාව සැලසුන බව කියැවෙන 2013 වසරේ නිකුත් කර ඇති ගැසට් නිවේදනය අවලංගු නොකරන බව සංවර්ධන උපාය මාර්ග සහ ජාත්යන්තර වෙළඳ නියෝජ්ය අමාත්ය නලීන් බණ්ඩාර මහතා පාර්ලිමේන්තුවේදී අද (24) පැවැසීය.

බැලූ බැල්මටම අදාළ ගැසට් නිවේදනයේ කිසිඳු ප්රශ්නයක් නැති බව තමන් පිළිගන්නා නමුත් එහි කොතැනක හෝ ගැටලු සහගත තත්ත්වයක් තිබෙන බව ද නියෝජ්ය අමාත්යවරයා කීවේය.

මෙම අවස්ථාවේදී නැඟී සිටි එක්සත් ජනතා නිදහස් සන්ධාන පාර්ලිමේන්තු මන්ත්රී ආචාර්ය බන්දුල ගුණවර්ධන මහතා පැවැසුවේ රටට කසල ගෙන්වීමට අවස්ථාව ලැබුණේ වත්මන් රජය අත්සන් තැබූ සිංගප්පූරු ගිවිසුම හේතුවෙන් බවය.

එයට පිළිතුරු දෙමින් නියෝජ්ය අමාත්යවරයා සඳහන් කර සිටියේ මෙම කසල ගෙන්වා තිබෙන්නේ සිංගප්පූරු වෙළඳ ගිවිසුම අත්සන් කිරීමට පෙර බවය.

කෙසේ වෙතත් මෙම කසල ගෙන්වීම නතර කරන බව කී නියෝජ්ය අමාත්යවරයා කසල කන්ටේනර් රටින් පිට කිරීමට හේලිස් සමාගමට සති තුනක කාලයක් දී තිබෙන බවද පැවැසීය.

මෙම කසල කන්ටේනර් ගෙන්වීම සම්බන්ධයෙන් ආයෝජන මණ්ඩලයේ අභ්යන්තර පරීක්ෂණයක් පවත්වන බව කී නියෝජ්ය අමාත්යවරයා මෙම ප්රශ්නය සුළුවෙන් තැකීමට රජය සූදානම් නැතැයිද සඳහන් කළේය.