දිනෙන් දින ඇද වැටෙන ආර්ථික අර්බුදය මධ්‍යයේත් ලාබ ලබන වතු සමාගම් විසින් වැටුප් වැඩි නොකිරීමට

එරෙහිව වතු කාර්ය මණ්ඩල සේවකයෝ විදී බැස සිටිති.

තලවාකැලේ මල්ලිඅප්පු කෝවිල් හන්දියට සති අන්තයේදී රැස්වූ දිවයිනේ පැරණිම වෘත්තීය සමිතියක් වූ ලංකා වතු සේවා සංගමයේ සාමාජික සාමාජිකාවන්  නගර මධ්‍යට පෙළපාලියකින් පැමිණ උද්ඝෝෂණය කරමින් ඉල්ලා සිටියේ දිනෙන් දින ඉහල යන ජීවන වියදම සළකා සිය වැටුප් සියයට 70 කින් කරන ලෙසයි.

ලංකා වතු සේවා සංගමය හා වතු හිමිකරුවන්ගේ සම්මේලනය අතර 2019 වසරේදී එළඹී සාමුහික ගිවිසුම සැප්තැම්බර් 30 වැනිදා අවසන් වීමත් සමඟ වැටුප් වැඩි කිරීමේ ඉල්ලීමේදී වතු හිමියන්ගේ සම්මේලනය එකඟ වී ඇත්තේ සියයට 28 කින් වැටුප් වැඩි කිරීමටයි.

එයද අදියර තුනක් යටතේයි. එම යෝජනා පිලිනොගත් වතු සේවා සංගමය වීදී බැස සටන් කරන්නට තීරණය කර තිබේ.

වතු නිෂ්පාදන ක්ෂේත්‍රයේ ලාභය තුන් ගුණයකින් ඉහල ගොස් ඇති බව පවසන එම වෘත්තීය සමිතිය පෙන්වා දෙන්නේ වතු සේවකයන්ගේ වැටුප සියයට 70 කින් වැඩි කිරීමේ හැකියාවක් හාම්පුතුන්ට ඇති බවයි.

වතු කම්කරුවන්ගේ දෛනික වැටුප රුපියල් දහස දක්වා වැඩි කරන ලෙස අධිකරණ නියෝග පවා තිබියදී එය ලබා දීමට වතු සමාගම් මැලි වෙයි.

කම්කරුවන් පවසන්නේ රුපියල් දහස දක්වා වැඩි කළද අද පවතින ජිවන වියදම හමුවේ එය ප්‍රමාණවත් නොවන බවයි