අරගලකරුවන් වෙතින් යළි අත්පත් කරගැනීමෙන් පසුව අරලිය ගහ මන්දිරයේ පැවැත්වෙන පළමු උත්සවය ලෙස ලෝක ජනාවාස දින ජාතික සැමරැම සංවිධානය කර ඇත .
එම උත්සවය අග්‍රාමාත්‍ය දිනේෂ් ගුණවර්ධන ගේ ප්‍රධානත්වයෙන් (03) පැවැත්වෙයි.
“වෙනසක් නොකරමු, කිසිවකු හෝ කිසිතැනක් අත් නොහැර රැකගනිමු” යන්න එහි තේමාවයි.
සෑම වර්ෂයකම ඔක්තෝබර් මස පළමු සඳුදා දිනයේදී ලෝක ජනාවාස දිනය සමරන අතර මෙවර පැවැත්වෙන්නේ එහි 36 වැනි සැමරුමයි.
ලෝක ජනාවාස දින සැමරැමට සමඟාමීව නාගරික සංවර්ධන හා නිවාස අමාත්‍යංශය සහ නාගරික ජනාවාස සංවර්ධන අධිකාරිය එක්ව නාගරික ජනාවාසවල ජනතාව වෙනුවෙන් සංවිධානය කරනු ලැබූ ළමා චිත්‍ර, කෙටි චිත්‍රපට හා ගෙවතු වගා තරඟවල ජයග්‍රාහකයන්ට ත්‍යාග ප්‍රධානය කිරීම මෙන්ම ජාතික නිවාස සංවර්ධන අධිකාරියේ නිවාස හිමිකම් ඔප්පු ප්‍රධානයක්ද මෙහිදී සිදුවේ.
නාගරික සංවර්ධන හා නිවාස අමාත්‍ය ප්‍රසන්න රණතුංග, එම අමාත්‍යංශයේ රාජ්‍ය අමාත්‍යවරුන් වන , අරුන්දික ප්‍රනාන්දු, තේනුක විදානගමගේ, එක්සත් ජාතීන්ගේ මානව ජනාවාස වැඩසටහනෙහි මෙරට ප්‍රධානී ලක්ෂ්මන් පෙරේරා ඇතුළු පිරිසක් මෙම අවස්ථාවට සහභාගී වීමට නියමිතය.
